Dinagu-ren azoka ibiltaria Gernikan izango da larunbatean
![Dinagu-ren azoka ibiltaria Gernikan izango da larunbatean Dinagu-ren azoka ibiltaria Gernikan izango da larunbatean](https://www.gaztezulo.eus/albisteak/dinagu-ren-azoka-ibiltaria-gernikan-izango-da-larunbatean/@@images/cda44c59-1195-40b4-a47a-dd141abf19c2.jpeg)
Dinagu emakume sortzaileen kolektiboak Nomadak Gaitun azoka ibiltaria antolatu du urriaren 16an, larunbata, Gernikako Astran. Alor ezberdinetako 20 emakume sortzailek beraien postutxoa jarriko dute eta denetariko produktuak bilduko dituzte bertan: bitxigintza, moda, kosmetika, zeramika, ilustrazioa...
Proiektu jasangarrien erakusleiho izatea, proiektu pertsonalak profesionalizatzeko bidean dauden sortzaileei bultzada ematea, eta diseinuaren eta irudiaren esparruan Euskal Herrian ekoiztutako produktuen eskaintza ikusaraztea du helburu ekimenak.
Azoka 16:00etatik 21:30era egongo da irekita eta sortzaileen lanak ikusi eta erosi ahal izango dira. Taberna ere zabalik egongo dela jakinarazi dute. Emakume ekoizleen sukaldea egongo da 20:00etatik 22:00etara eta jarraian, 22:30ean, Nebbian taldearen kontzertua.