Asisko Urmeneta: "Egiazko libertinoa izan nahi nuke"

Asisko Urmeneta: "Egiazko libertinoa izan nahi nuke" https://www.gaztezulo.eus/albisteak/asisko-urmeneta-quotegiazko-libertinoa-izan-nahi-nukequot/@@download/image/38p52-1.jpg
2012/12/13
elkarrizketa
Iruinseme. Irudigile. Hierarkia guztiak zulora igorriko lituzkeela dio. 38 urte. Zirikatzailea. Walt Disney-ren filmeetako maltzurrak, "zintzoen ondoan, erakargarriagoak iruditzen zaizkit".


Arrunt laket dut: Komunikazioa. Jendearekin solasean jardutea.

Ez dut parean ikusi ere egin nahi: Esklusibismoa.


Lasaigarri zait: Masturbatzea.

Sutan jartzen nau: Amak. Euskal Herriko amak kriptonita bezalakoak dira.


Gustura irakurri nuen: Kepa Antonagaren "Folin markesa". Bere zale porrokatu bihurtu naiz.

Lo seko geratu nintzen irakurriz: Nahiz eta leher eginda egon,  ez nau loak hartzen.  


Bertutea: Badakit gezurrak esaten.

Akatsa: Ez naiz gezurti perfektua.


Ametsa: Grabitate legerik gabe, haizean barrena ibiltzea.

Amesgaiztoa: Hortzak poliki erortzen zaizkidala amesten dut. Zahartzeko beldurra omen dut.


Barre algara eragiten dit: Kalean, edonoren erorikoak.

Negargura ez dut urruti: Irunberriko ikastolako haurrak negarrez ikusi nituenean...


Urrea: Demo-ei. Umorea galdu gabe, borroka bide berriak daudela erakutsi dutelako.

Ikatza: Negu hotz honetan, Miguel Sanz-i ikatza ukatuko nioke. Hotza pasatzea merezi du.


"Anttoni, Anttoni, zure atean nago ni…": Ate asko jo dut… Egia erran, kanpai anitz.   

"… ai Antton, ai Antton, ate ondoan hor konpon": Atarian geratu izan naiz maiz. Egiazko libertinoa izan nahi nuke.


Nafarroako hizkuntz politikaren ortzadarrak zein kolore du?: Monokromoa da. Hizkuntz bakarra erabiltzen dutenez, euskara ez dute ikusi ere egiten.

Marraz iezaguzu lau zertzeladatan euskararen etorkizuna: Euskara kolore bizidun landarea dugu. Hala ere, ez dago baldintza onenetan, soberan adarkatua izan baita.  


Hatzak zupatzen ditut: Edozein arrain, plantxan.

Gogoko ez dudan jakia: Zorionez, jale ona naiz.


Dirua ordainduko nuke: Tronpeta jotzen ikasteagatik.
Ez nieke xentimorik ere emango: Militarrei.