ZIRT-ZART: Marina Landa

Euskal Herriko pop musikari buruzko doktoretza-tesian buru belarri aritu da Marina Landa (Donostia, 1993) azken urteetan. Orain, Aria taldearekin 'Urdin' diskoa kaleratu du, eta galdera bihurri hauek erantzuteko tartea ere hartu du.

•  Sekula egin ez dizuten zein galdera egitea gustatuko litzaizuke?
  “Zergatik ez duzu lehenago publikatu zure diskorik?". Atzean dagoen azalpena ematea garrantzitsua litzateke niretzat.
• ‘Clickbait’ egiteko zein titularren protagonista izatea gustatuko litzaizuke?
  Ez ditut titular sentsazionalistak gustuko, baina, izatekotan, “euskuore” pixka bat saltzen duen batean; abeslari famatu batekin nabilela, adibidez.
  
  
  
• Gustatzen zaizun, baina gustatzen zaizula sekula aitortuko ez zenukeen artista?
  Alejandro Sanz . Nire balioen kontrako kanta asko izan arren, batzuk txikitatik buruz dakizkit eta noizbehinka entzutea gustuko dut!
• Zein platera kozinatu ahalko zenuke momentu honetan hozkailuan duzunarekin?
  Izozkailuak ez du balio, ezta? Orduan, tortilla edo entsalada.
• Zure hurrengo diskoak Whatsappeko zure azken mezuaren izenburua izango balu, zer izen izango luke?
  "Oraindik ez da berria iritsi ".
• Zer abestik ematen dizu nazka?
  "Tu fuiste mala, que te recojan con pala” (gaiztoa izan zinen, pala batekin jaso zaitzatela) esaten duena. Izugarri haserretzen naiz norbaitek abesten duenean.
• Zer abesti aukeratuko zenuke zure hiletarako?
  Simon & Garfunkel-en The sound of silence. Nire gurasoen ezkontzako bideoko kanta da eta beti izan da berezia niretzat. Hala ere, asko gustatuko litzaidake nire ingurukoek Hotza izeneko nire kanta abestea.
• Zer birao duzu gustukoen?
  Ia guztiak. "Hostia" eta "joder" gehiegi erabiltzen ditut…
• Interneten zuri buruzko gauzen bila aritu izan al zara?
  Bai, behin baino gehiagotan, eta horri esker deskubritu nuen nire izen bereko konpositore errusiar bat dagoela, 1960an jaioa!
  
  
  
  
• Zerurik izango balitz, Jainkoak zer esatea gustatuko litzaizuke sarrerara iristean?
  "Ondo egin duzu, baina ez zenuen nik esateko beharrik".
• Zertan lan egin izan duzu?
  Komunikazio arduradun, kultur kudeatzaile, museo bateko azafata, ikertzaile, erredaktore, gida turistiko, community manager...
• Zure ezaugarriren bat aldatu ahalko bazenu, zer aldatuko zenuke?
  Zalantzarik gabe, gehiegi pentsatzeko joera. Gutxiago pentsatu nahiko nuke, burua askatu eta ekin, beldur gutxiagorekin.
• Zer da besteengan gehien gorroto duzuna?
  Begirune eza, edozer esateko eskubidea dutela sentitzea, autokritikarik egin gabe besteak epaitzea, komunitate batekiko edozein fobia... Ufa, gauza dezente.
• Zer bertute balioesten da behar baino gehiago?
  Zintzotasuna, egia esanda. Egia esaten jakin behar da: noiz, nola, nork, nori... Egia ezin da guztiaren gainetik egon.
• Zer hitz duzu kutunen?
  Azkenaldian "aria", gure taldearen izena. Nire mantra bezalakoa da.
• Zein da deskargatu duzun azken app-a?
  Wallapop. Gitarra bat eta bi telebista ditut salgai, norbaitek interesa baldin badu...
  
  
  
  
• Fikziozko zer pertsonaia nahiko zenuke laguntzat?
  Chandler Bing.
• Zer pentsatuko luke zure bertsio gazteagoak zutaz?
  Ez naizela nahikoa errebelde, baina bizitzan ahal dudana egiten ari naizela.
• Deskribatu zure bizitza bost hitzetan.
  Abestiak, mugak gainditzea, begirunea, garraio publikoa eta estresa.
• Esan eta berehala damutu zaren esaldia?
  "Lasai, nik egingo dut!". Ez, onartu behar dut ezin dudala nik guztia egin.
• Zer hitz edo esaldi erabiltzen duzu behar baino gehiagotan?
  "Ai ene!!!".
• Zer hitz gustatzen zaizu gutxien?
  “Gorotz", adibidez.