ZIRT-ZART: ANER PERITZ

ANER PERITZ MANTEROLA (ZARAUTZ, 2002) BERTSOLARIA DA. 2022AN, BERTSOLARI GAZTEEK SORTURIKO 'ERRE' IKUSKIZUNEAN PARTE HARTU DU. ARGIAREN 'BEREZKOA TA NATURALA' BERTSOLARI TXAPELKETA NAGUSIAREN INGURUKO BIDEO-PODCASTEAN ERE ARITZEN DA. NATURAL-NATURAL ERANTZUN DIZKIGU GALDERA HAUEK.

• Zoriontsua zara? Zer da zuretzat zoriontasuna?
  Niretzat zoriontasuna da goizetan jaiki eta pisukideak gosaria prestatu dizula ikustea. Ez naiz zoriontsua.
• Sekula egin ez dizuten zer galdera egitea gustatuko litzaizuke?
  “Zergatik zara heteroa?”
• Zein platera kozinatu ahalko zenuke momentu honetan hozkailuan duzunarekin?
  Mortadela-tortilla garagardo-saltsan.
• Zer da egin duzun erokeriarik handiena?
  Lau hilabete oso igaro nuen ostiraletan goizeko bederatzietako klasera azaltzen. Ez nuke gomendatuko.

• 'Clickbait' egiteko zein titularren protagonista izatea gustatuko litzaizuke?
  “Aner Euzkitze Iñaki Artolarekin hasi da”.
• Zeinengatik aldatuko zinateke, aldatuko bazina?
  Ez nintzateke aldatuko; gaixoa ni izatea tokatzen zaiona...
• Zein da deskargatu duzun azken app-a?
  TikTok-a.
• Zer dio bidali duzun azken Whatsapp mezuak?
  “Nik larunbatian ezin det”.
• Zer bertute balioesten da behar baino gehiago?
  Memoria. Gogoratzea aspergarriegia da, gauzak asmatu egin behar dira. 
• Zer abesti aukeratuko zenuke zure hiletarako?
  Zorionak zuri.
• Esan eta berehala damutu zaren esaldia?
  “Keba, lasai, ez du inporta”.
• Nola irudikatzen duzu zure burua hemendik hogei urtera?
  Okertuta, burusoil eta insomnioarekin. Optimistegia naiz beharbada.
• Zer abestik ematen dizu nazka?
  Gatiburen edozeinek.
• Interneten zuri buruzko gauzen bila aritu izan al zara?
  Askotan begiratzen diot, irudiei batez ere. Nire izena jarrita, nire argazkiak aitarenak baino gehiago agertzen diren egunean kezkatuko naiz.
• Dirua traba ez balitz, zer egingo zenuke?
  Gorde. Baina traba egiten dit, eta gastatu baino ez dut egiten.
• Nork dakizki zure sekretu gehien?
  Bill Gatesek.

• Zer da besteengan gehien gorroto duzuna?
  Ingelesez ondo ahoskatzea.
• Noiz esaten duzu gezurra?
  Egia esaten ez dudan aldi guztietan.
• Zer pentsatuko luke zure bertsio gazteagoak zutaz?
  “Nik ez dut hori izan nahi”.
• Zer hitz edo esaldi erabiltzen duzu behar baino gehiagotan?
  “Ok, boomer”.
• Zer talentu izatea gustatuko litzaizuke?
  Genitalak duintasunez depilatzeko talentua.
• Zure ezaugarriren bat aldatu ahalko bazenu, zer aldatuko zenuke?
  Ez dakit minutu eta erdi baino gutxiago irauten duten audioak bidaltzen. Inork konbertsio-terapiarik ezagutuko balu, abisa diezadala.
• Zertaz damutzen zara gehien?
  Eman ditudan baiezko askoz. Bizitzaren alderdi askotara estrapola liteke hau.
• Zer birao duzu gustukoen?
  Lerdoa.
• Zerurik izango balitz, Jainkoak zer esatea gustatuko litzaizuke sarrerara iristean?
  “Ok, boomer”.
• Zer hitz duzu kutunen?
  Ttunkurrukuttun.
• Zer hitz gustatzen zaizu gutxien?
  Ajea.
• Dena dakien izaki bati galdera bat egin ahal izango bazenio, zer galdetuko zenioke?
  “Badakizu zer ez dakizun?” edo “Nola deitzen zaio igogailuari beherantz doanean?”.
• Zer azaltzen da zure mugikorrean gordeta duzun azken argazkian?
  Haizea Arana eta bion argazki bat da, parranda transmaribollo batean Jon Maiarekin.