Villasoundbilbao lehiaketaren kontzertuak apirilaren 4an hasiko dira, Bilborocken
Aukeratutako hamabi taldeek joko dute eta horietako batek lau kontzertuko bira egingo du.
VillaSoundBilbao jaialdiaren IV. edizioak apirilean kontzertuak emateko hamabi talde aukeratu ditu. Emanaldiak ostegunetan izango dira, Bilborocken, arratsaldeko zortzietatik aurrera, eta sarrera librea izango da. Hala, 16 eta 35 urte arteko gazteen sorkuntza lanak sustatu nahi dituzte.
Hau izango da kontzertuen egitaraua: apirilaren 4an, Bizkaiko Gydeon, Kalipotxo eta Krivex; apirilaren 11n, Gipuzkoako Badmintones, eta Bizkaiko Mikosis eta S.A.D.; apirilaren 18an, Bizkaiko Irati Reich eta Markos Garcia, eta Gipuzkoako Xabier Badiola; eta apirilaren 25ean, Gipuzkoako Latido eta Bizkaiko Net Bby eta Rally 48.
Apirilean, hamabi taldeek VSB MENTORING prestakuntza-programan parte hartuko dute, eta horietatik sei hautatuko ditu epaimahaiak, lagun egiteko programa batean parte hartzeko, maiatzean eta ekainean.
Kontzertuen fasea amaitu ondoren, Espainiako Estatuko lau kontzertuko biran zein taldek edo bakarlarik parte hartuko duen jakinaraziko dute Bilborocken maiatzaren 4an, baita epaimahaiak eta babesleek egindako gainerako aipamenak ere. Ekitaldia amaitzeko, La Paloma-k kontzertua emango du.
Guztira 156 taldek eta bakarlarik eman dute izena VSBren laugarren edizioan, eta aukeratuak Bizkaiko bederatzi eta Gipuzkoako hiru izan dira. Talde horietako hogeita hamasei pertsonen artean, bederatzi emakumeak dira. Kantuetan erabilitako hizkuntzari dagokionez, gaztelania da nagusi (% 45), eta ondoren euskara (% 32), eta ingelesa (% 20). Aukeratutako talde eta bakarlarien batez besteko adina 27 urtekoa da.