SEXUMATOIA: ENERITZ FURYAK

Eneritz Dueso (Irun, 1993) musikaria, Eneritz Furyak bilakatzen da gitarra batekin eskuan melodia katramilatsu bezain atseginak helarazteko. Beste Alter Egoren bat edukiko al du izaren azpian jarduten denean?

• Zein da zure film erromantiko gogokoena?
  Carol (Todd Haynes, 2015) asko gustatu zitzaidan, baina ez dago Gabonetako film erromantiko txarrak biharamunarekin ikustea bezalakorik.
• Noiz eman zenuen zure lehen muxua?
  Adina ez dut gogoan, baina kuadrillako azkena izan nintzen norbait musukatzen. Azken putz.
• Joango al zinateke zita batera itsu-itsuan?
  Miopea naiz, ez dakit bestela joaten.
• Zer da zita batean inoiz esan behar ez dena?
  “Ez zara beste neskak bezalakoa”. Faborez...   
• Lehen begiratuan erakartzen zaituen hori?
  Misterioak erakartzen nau. Dena ez esateak, lotsak, harroputza ez den jendeak bere burua “interesgarri” gisa azaldu nahi duenean erakutsi ohi duen xalotasunak...
• Ligatzeko erabili duzun trikimailurik onena?
  Bost minutuz jarraian isilik egotea. Trikimailu ederra litzateke gustatzen zaidan jendearen inguruan erabiltzen ikasiko banu!
• Zita batean, zuk ematen al duzu lehen pausoa, ala nahiago besteak aurrea hartzea?
  Aldi berean estropezu egitearen aldekoa naiz. Lehen musua hortzen arteko talka baldarra bilakatzen denean bezala.
• Zer menu prestatuko zenuke lehen zita batean?
  Menu? Prestatu? Ezin al gara inora afaltzera joan? Zer da, urtarrilaren 1eko gaua? Goizeko 4ak? Iparraldeko belaze galdu bat, 20:00etan? Bardeak? Zergatik gaude hemen ordu honetan? Nondik gatoz? Nora goaz? Zergatik gara hain ergelak? Honek ez du etorkizunik... utikan! Afaldu gabe ohera, eta bakoitza berera.
• Argia piztuta ala itzalita?
  Piztuta, baina ahal bada apal.
• Inoiz eman dizuten gomendiorik onena ligatzeko?
  “Eneritz, utzi dantzatzeari”.
• Eta txarrena?
  “Dantzatu”. Hori obsesioa dantzarekin. Utz nazatela bakean.
• Etxeko zein txoko da zuretzat onena sexurako?
  Ohea. Altzarietan altzaria.
• Inoiz harrapatu al zaituzte jo eta su?
  Katuek. Eta ez nire katuek bakarrik. Beti diot “Katu Voyeur” fanzinea egingo dudala egunen batean.
• Aurreko beroketak; bai ala zuzenean ekintzetara?
  Beroketak ere ekintza dira.
• Zein da inoiz egin dizuten proposamenik zoroena?
  Txepelena hauxe: autotzar batean eramango nindutela, eta ez dakit zer leku garestitara bazkaltzera eraman, eta ez dakit zer erosi...