Plastikoari boikot: ongi etorri 'plastikariano' garaira

Dirudienez, pixkanaka ari da plastikoaren inguruko kezka ekologikoa zabaltzen, eta geroz eta gehiago dira plastikoak erostea ekiditeko saiakera egiten dutenak. Hala, aste honetan plastikoari erabateko boikota egiteko deia zabaldu dute; baietz 7 egunez plastikorik erosi gabe biziraun?

Asko dira sare sozialetan erronkara batu direnak, baina ez da uste bezain erraza plastikoak ekiditea. Supermerkatuetan sartu eta begiratu bat botatzea besterik ez dago; ziur aski, produktu asko plastifikatuta aurkituko dituzue, eta beraz, erositakoa garraiatzeko telazko poltsa eramatearekin ez duzue nahikoa izango.

Zorrotz begiratuta, konturatuko zarete produktu gehienek dutela plastikozko edukiontzia; esnekiak, ogia, lekaleak, pasta eta arrozak, hestebeteak, prestatutako edo prozesatutako jakiak, garbiketa produktuak... dena dago plastikoz inguraturik, askotan, frutak eta barazkiak barne.

Hala, nahiz eta telazko poltsa eraman, frutarentzat telazko sareak erabili, haragi eta arraina erosteko tuperrak eraman eta psoible den heinean plastikoa duten produktuak erostea ekidin, ia ezinezkoa egingo zaizue etxera plastikorik gabe iristea. Aldaketa, beraz, ez dago soilik kontsumitzaileen esku, supermerkatuek ardura handia dute. Horregatik, aste honetan egiten dugunak balio dezake supermerkatuei aldaketa egitera behartzeko. Plastikorik ez badugu erosten, plastikoak kenduko dituztelako.

NOLA BIHURTU 'PLASIKARIANO'

Plastikoaren aurkako boikotarekin bat egin nahi duzu eta ez dakizu nola? Hemen dituzu gomendio batzuk:

• Erosketa planifikatu: aukeratu plastikorik gabe edo ia plastikorik gabeko produktuak saltzen dituzten saltokiak.
• Bueltatu ontziratu gabeko dendetara: Gogoratzen txikitan lekale, arroz eta bestelako zereal zaku erraldoiez betetako dendak?
• Kantinplora erabili: Gure ura osasuntsua da, zortekoak gu! Eta gogoratu, jatetxeetan iturriko ura eskatzeko eskubidea dugu!
• Tupper-tupper: Etxetik kanpo bazkaltzen baduzu, eraman ere zure sardeska eta labana.

• Solidoak: Xaboi eta xanpu pastilak, garbiketa produktu naturalak...
• Kopa: Tanpoi eta konpresen ordeko alternatiba bikaina, telazko konpresa eta hileroko kuleroekin batera.
• Desodorantea, hortzetako pasta: Produktu hauek zuk zeuk egin ditzakezu, bazenekien? Interneten errezeta ugari daude.
• Zaborretako poltsa: Berez, zuzenean edukiontzitik zaborretara bota daitezke soberakinak, ondoren kamioietan poltsak apurtu egiten direlako, baina zoritxarrez, isuna jaso dezakezu poltsarik ez erabiltzeagatik. Dena den, badira poltsa biodegradagarriak.