Nebukai: "Ez dago Streamer euskaldun ezagunik, eta horrek euskaldunok euskaraz jardun eta elkartzeko tokitxo bat ez edukitzea egiten du"

Nebukai: "Ez dago Streamer euskaldun ezagunik, eta horrek euskaldunok euskaraz jardun eta elkartzeko tokitxo bat ez edukitzea egiten du" Ba ote dago euskal gamer komunitaterik? Ez da erraza, kontuan hartuta joko gehienak gazteleraz ala ingelesez jolasten direla. Horregatik, Nebukai gamerrak eskaera jarri du martxan, Twitch-en zuzenekoak euskaraz egin ahal izateko. Bere eskaerak dagoeneko 200dik gora boza lortu ditu. Harekin mintzatu gara: https://www.gaztezulo.eus/albisteak/nebukai-ez-dago-streamer-euskaldun-ezagunik-eta-horrek-euskaldunok-euskaraz-jardun-eta-elkartzeko-tokitxo-bat-ez-edukitzea-egiten-du/@@download/image/IMG_20200917_165645_044.png
2020/09/18
elkarrizketa

Ane Urrutikoetxea @aneurruti

Ba ote dago euskal gamer komunitaterik? Ez da erraza, kontuan hartuta joko gehienak gazteleraz ala ingelesez jolasten direla. Horregatik, Nebukai gamerrak eskaera jarri du martxan, Twitch-en zuzenekoak euskaraz egin ahal izateko. Bere eskaerak dagoeneko 200dik gora boza lortu ditu. Harekin mintzatu gara:
Nebukai: "Ez dago Streamer euskaldun ezagunik, eta horrek euskaldunok euskaraz jardun eta elkartzeko tokitxo bat ez edukitzea egiten du"
Noiztik zara Twitch-en erabiltzaile?
Duela bost urte gutxi gorabehera.

Euskaldun komunitate zabala topatu duzu bertan?
Twitch-en euskaldun dezente topatu ditut, baina ez komunitate moduan. Ez dago Streamer euskaldun ezagunik, eta horrek euskaldunok euskaraz jardun eta elkartzeko tokitxo bat ez edukitzea egiten du.

Euskarak zer nolako presentzia du egun gamer munduan?
Presentzia nahiko eskasa duela uste dut. Zortez baditugu elkarte eta taldeak euskarari bideo-jokoen munduan leku duin bat lortzeko lanean ari direnak (Game Erauntsia eta Pixel Berri adibidez), baina gatazkak sustrai oso sakonak dituela uste dut.
Euskalduna naiz eta bizitza euskaraz egin izan dut jaio nintzenetik, baina bideo-jokoen alorrean beti aritu naiz gazteleraz.
Lagunekin euskaraz jolastu izan dut, baina bideo-jokoak gazteleraz edo ingelesez jolastu ditut, gamer edo influencer erreferenteak beti izan ditut gaztelera eta ingeles hiztunak, eta bideo-jokoen arlo profesionalean errazagoa izan da euskara ez den beste edozein hizkuntzatan lekua bilatu eta aurkitzea. 
Gure euskaldun txikitxoek bideo-jokoez eta bideo-jokoen mundu zabalaz euskaraz gozatzeko aukerarik ez badute, nik eta beste hainbat euskaldun gamerrek ezagututako errealitate berdinarekin topatuko dira. Eskaintza existitu behar du eskaera existitzeko, eta eskaintza hori existitzea gure esku dago.
 

Euskarari tokitxo hori egitea beharrezkoa ikusten dut, euskaldunok euskaraz zuzenekoak egin eta ikusteko eskubidea dugu; "euskara" plataforman hizkuntza aukera bat ez den bitartean hori lortzea oraindik zailagoa izango da.


Twitch-en zuzenekoak euskaraz emateko eskaera abiatu duzu, zergatik?
Duela 4-5 urte saiakera bat egin nuen euskaraz zuzenekoak egiteko, baina pare bat saiakera ondoren momentua ez zela ikusi nuen eta nire gaztelerako kontuarekin jarraitu nuen.
Azken boladan Twitch-ek eta bideo-jokoek indar handia hartu dute, baina beste hainbat alorretan gertatzen den bezala euskarak ez du bere tokia.
Euskarari tokitxo hori egitea beharrezkoa ikusten dut, euskaldunok euskaraz zuzenekoak egin eta ikusteko eskubidea dugu; "euskara" plataforman hizkuntza aukera bat ez den bitartean hori lortzea oraindik zailagoa izango da.

Zuzenekoak euskaraz egiteak jende gehiagorengana iristeko aukera eskainiko lizuke?
Twitch plataforman hizkuntzaren arabera iragazi dezakezu (beste hainbat gauzen artean), hizkuntza ezberdinetan dauden zuzenekoetara iristeko. Gaur egun ez dago "euskara" iragazteko hizkuntza aukera horien artean. Aukera hori ez egoteak, zuzeneko hauek aurkitzea benetako erronka bilakatzen du. 
Aukera edukiko bagenu, euskara hutsean zuzenekoak ikusi nahi dituztenek aukera izango lukete Streamer hauetara iristeko.
 

Zenbateko garrantzia du hizkuntzak jokoetan?
Zenbateko garrantzia du hizkuntzak norberaren bizitzan? Norberak nahi duen hizkuntzan bizitzeko aukera edukitzea oinarrizkoa dela uste dut: egunkaria irakurtzea, irratia entzutea, erosketak egitea, mugikorrean ibiltzea... Bideo-jokoak eta horiek biltzen duen mundua (gamerrak, influencerrak, albisteak, lanak...) euskaraz behar ditugu zaleak garenok edo honetan lan egiten dugunok euskaraz gozatu ahal izateko. 

Euskal Encounterren parte hartu zenuen, nolako esperientzia izan zen?
7 urtez aritu naiz parte hartzaile moduan Euskal Encounterren. Aurten laguntzaile gisa aritu naiz lehen aldiz, eta esperientzia benetan aberasgarria izan da. 
Parte hartzaile moduan aukera ikaragarri pila dituzu bertan giro bideo-jokozale eta "friki" batean egun zoragarri batzuk pasatzeko eta jendea ezagutzeko.
Laguntzaile gisa arlo ezberdin askotako zale eta profesionalekin lanean aritzeko aukera izan dut familia-ingurune batean; hurrengo edizioa iristeko gogoz nago, gehiago ikasi eta disfrutatzeko.

Zenbateko garrantzia du Euskal Encounterrek euskal gamerren komunitatean?  
Ez gehiegi. Nahiz eta izen-ematea, web orrialdea eta sare sozialak euskaraz disfrutatzeko aukera eduki, Euskal Encounter ekitaldian bertan aurrera eramaten diren hitzaldi, tailer eta jarduera gehienak ez dira euskaraz izaten.
Behar bada hurrengo edizioetan zehar euskal gamer komunitateari lekutxo bat aurkitu eta hori garatzeko aukera edukiko dugu.