Mikrofilm Short Festivalaren 1. edizioa Plentzian

Mundu mailako genero beltzeko film labur onenak erakusteko asmoz sortutako ekitaldia da, eta aurtengoan lehen urtez egingo dute Plentzian uztailaren 6an eta 7an. Hamabost lan aurkeztu dituzte jaialdira, eta sari potoloak eskuratzeko aukera izango dute.

---

Genero beltzeko zinemak ez du leku handiegirik gure artean, eta hori dela eta, bi gauez hilketetan oinarritutako film laburrak ikusteko aukera eskaini nahi dute antolatzaileek. Hain zuzen, AEBetan 30eko eta 40ko hamarkadetan ekoitzitako zine mota nagusituko da Mikrofilm Short Festivalean.
 
Izena eman dutenen artean, hamabost lan aukeratu dituzte. Euskal Herritik, AEBetatik, Poloniatik, Kanadatik, Argentinatik eta beste hainbat tokitatik etorritako ekoizleek aurkeztu dituzte. Epaimahaiak, besteak beste, sekuentzien ugaritasuna, argiluna lehenesten duten argazkigintza, eta genero honetako filmek izaten duten kode estetikoa lehenetsiko ditu horien artean hoberenak aukeratzerako orduan.

Bi sari banatuko dituzte: Film Labur Onenaren Saria, 2.000 eurokoa, eta Ikuslegoaren Saria, 1.000 eurokoa.

Edukiei dagokienez, gizartearen ikuspegi kritikoa, argitu gabeko misterioak, patuaren zorigaiztoak gidatutako istorioak, eta halako beste hainbat alor lantzen dituzten lanak izango dira nagusi, antolatzaileek aditzera eman dutenez.