Jurgi Ekizak 'Argitzala' izeneko bakarkako lana kaleratu du

Willis Drummond taldearen etenaldi mugagabea aprobetxatu du Jurgi Ekizak bere bigarren lan luzea sortzeko. Gaur argitaratutako Argitzala diskoak hamaika kantu ditu, eta, izenburuaren harira, honako galdera pausatzen du: "Non hasten da bata eta non bestea?".

Diskoaren izen bereko kantuak honela dio: "Paper orriaren gainean, zenbait lauki. Behar dut erabaki nun kokatu gurutzea eta zein toki izanen den enea. Argia. Itzala. Nun hasten da bata ala bestea? Argitzala. Bi laukiren artean, beste bat faltan botatzen dut frangotan. Bi graduren artean, hirugarren bat beti bada azkenean". Hain zuzen ere, "gizarteak dena laukietan sartzeko joera duela" eta proposatutako laukien artean hautatzeko ezintasuna ala horrekiko ukazioa adierazten da nagusiki kantuetan.

Diskoan sentimenduekiko eta sentsazioekiko harremana islatu du: "Sentitzen duguna asumitzeko eta aldarrikatzeko deialdi bat da, ona eta txarra kanporatzeko, ahuleziak eta beldurrak ere aitortzeko, emozio hauek gozatzeko ala haietatik libratzeko".

Dolumina, ihes egiteko beharra, tristezia, maitasuna, antsia eta bere oposizioan den bakea, desagertzeko beldurra, bakartasuna ala bakartasun sentipena, obsesioak, poz hutsa eta laukietan ez sartzeko sentsazioa ageri dira letretan. Eta bereziki sentimendu horiek onartzeko, ulertzeko eta usu bizitzeko beharra aipatzen du. Esaterako, Gora negarra izeneko kantuan hala abesten du: "Orain onartu behar da, baita irakatsi ere, negar egitea on dela, mutil eta gizonentzat ere bai". 

Iluna eta argia, kezkak eta utopiak nahasten ditu Ekizak azken lan honetan. Musika aldetik ere baditu kontrasteak: ukelele soila, gitarra klasikoa eta elektrikoa, grunge ukituak, sintetizadoreak, erritmo elektronikoak, perkusioak, bateriak eta erritmo kutxak, haize sampleak...

Ekizak ahotsaren garrantzia nabarmendu du: "Erranen nuke ahotsa dela haria diska honetan, eta ahots hori bidaiatzen egoten dela kantu, erritmo eta testura ezberdinen artean, zati guztiak bata besteen kontra tinkatzen saiatuz, hari fisiko batek oihalezko patchwork batean eginen luken bezala. Hori izan da bederen egiten saiatu naizena". 

Lehen aldiz, Ekizak berak grabatu, nahastu eta masterizatu du disko osoa. Hark azaldu duenez, "erabaki artistikoa izan da diska isolamenduan eta bakar-bakarrik egitea. Hitzak eta musika sortzeaz gain, ene gain hartu nuen tresna guztiak jotzea, programatzea, eta dena grabatzea, nahastea eta masterizatzea ene estudio ttipian". Hazparnen eta Punaauian, Polinesian, ondu du lana eta haren ustetan horrek ere izan du zerikusia diskoaren sentipen nagusiarekin: "Denbora bi lekuren artean banatzeak kontra efektua sor dezake, eta batean baino gehiagotan ez nintzen sentitzen ez han eta ez hemen".

Diskoaren azala Sarah Labonne artistak egin du eta Ekiza pozik gelditu da haren lanarekin: "Masterra entzutea eta diskaren hitzen itzulpena irakurtzea proposatu nion, ea zerbait inspiratzen zion. Ordu pare bat berantago lehen ideia jaso nuen, eta istantean jakin nuen diskaren portada izanen zela. Hitzetan agertzen diren nozio bat baino gehio agerrarazteaz gain (itsasoa, testurak, argia eta itzala, besteak beste), collagearen konzeptuak berak bat egiten zuen diskaren mamiarekin, eta patchwork musikalaren errealitate horrekin. Kanpoko norbaitek, gainera aitzinetik ezagutzen ez nuenak, diska horrela irudikatzeak baretu ninduen egia erran". 

Diskoa aurkezteko bira
Kantuak diskoan bezala jotzeko talde baten beharra izanik ere, biraren lehen fasean behintzat, diskoa bakarka aurkezteko erabakia hartu du baionarrak, mota guztietako lekuetan jo ahal izateko. Kantu batzuk biluzik joko ditu eta beste batzuk samplerrarekin eta bestelako elementuekin jantziko ditu. 

Hogeita bat kontzertu iragarri ditu. Lehen kontzertua Bilboko Kafe Antzokian izango da, irailaren 18an, eta azkena Baionako Luna Negra aretoan, urriaren 28an. Tartean beste hainbat lekutan arituko da, besteak beste, Elizondon, Mutrikun, Maulen, Gasteizen, Laudion, Abadinon, Seguran, Tolosan, Iruñean, eta Donostian.

"Makro kontzertu eta soldout-aren garai honetan, fenomeno horrek sortzen dituen ilusio eta desilusio guztiekin, garrantzitsua iruditzen zait oroitaraztea Euskal Herriko eta bereziki euskarazko musikari gehienen errealitatea hau dela, herriz herri ibiltzea, eta euskal kulturaren mamia, berezitasuna eta aberastasuna sare eder horretan datzala. Zaindu ditzagun urtean zehar eta txoko guztietan kontzertuak antolatzen dituzten areto, elkarte, taberna, gaztetxe, pertsona eta kolektiboak. Ezinbestekoak baitira euskal kulturak bizirik iraun dezan".

Erakusketa Hazparnen
Lan berria giroa goxoan eta berezian aurkezteko modua ere prestatu du musikariak. Hazparneko "choribit" erakusketa lekuan izango da irailaren 1etik 6ra, eta bertan diskoaren azala egiteko erabili den collage originala ikusteko eta disko berria entzuteko postua izango da. Kantu batzuk zuzenean ere joko dituela jakinarazi du. Gainera, Ekizaren diskoak eta Willis Drummondenak ere erosi ahal izango dira.