Ikuspegi feminista duten hamar telesail

Telesail eskaintza handia dago gaur egun plataformetan, eta sarritan ez da erraza izaten zer ikusi erabakitzea. Algoritmoaren esku ere uzten dugu zenbaitetan. Bada, hautaketa egiten laguntzeko, hemen dituzu ikuspegi feminista duten hamar telesail:

• Mrs. America. AEBetako Eskubide Berdintasunaren Emendakinaren inguruko eztabaida kontatzen du. AEBetako mugimendu feministaren hainbat korronte erakusten ditu, eta emakumeen eskubideen eta borroka feministaren atzeko tentsio politikoa jartzen du agerian. Cate Blanchett, Rose Byrne, Elizabeth Banks eta Sarah Paulson aktoreak ikusiko dituzu besteak beste. 
• Self made. Madam C. J. Walker afroamerikarraren bizitzan oinarritutako lau ataletako telesaila da. Garbiketa lanak utzi eta ilea zaintzeko produktuak saltzen zituen enpresa hastapenetik eraiki eta garatuta, dirudun bilakatu zen. Telesailak egindako bidea kontatzen du, eta XX. mendeko AEBetan beltza eta emakumea izateak zekarren diskriminazioa ere erakusten du. Octavia Spencerrek gorpuztu du protagonista. 
• I May Destroy You. Twitterren ospea lortu eta nobelagintzan hasi den Arabella gaztea da istorioaren protagonista. Arrakasta izan du bere lehen liburuak eta bigarrena bukatzeko komeriatan dabilela, lagunekin aterako da gauean. Hurrengo egunean ez du oroituko bezperan zer gertatu den, eta bere lagunen laguntzaz gauean jazotakoak gogoratzen saiatuko da. 2020ko telesail honek hainbat izendapen eta sari jaso zituen.

• Derry Girls. 1990eko hamarkadan Ipar Irlandan kokatutako umorezko telesaila da. Bertako gatazka politikoaren testuinguruan, Derryko institutu katoliko bateko neska nerabe talde baten eguneroko abenturak eta xelebrekeriak kontatzen ditu. Gerora Bridgerton telesailean lan egin eta oso ezaguna egin den Nicola Coughlan aktorea da nesketako bat. 
• Maid. Alex (Margaret Qualley) izeneko ama gazte baten istorioa du ardatz hamar ataleko telesailak. Abusu-harreman batetik ihes egin eta etxeak garbitzen hasiko da, bere alaba txikia mantentzeko eta etorkizun hobe bat izateko. Ez da erraza izango, pobreziaren eta burokraziaren aurka borrokatu beharko baitu.
• Fleabag. Phoebe Waller-Bridgek sortu eta antzeztutako telesaila da, komedia eta drama uztartzen dituena. Londresen bizi den eta dolu prozesuan dagoen emakume gazte eta argi bat da protagonista. Haren bizitza ikusiko dugu, bere kontraesanekin, doluari, maitasunari eta familia-harreman nahasiei aurre egiten diela. Telesailaren berezitasunetako bat da protagonistak laugarren pareta hautsi eta tarteka kamerari zuzenean begiratu eta ikusleari hitz egiten diola, bere pentsamenduak partekatzeko.
• The Handmaid's Tale. Margaret Atwood idazle kanadarraren eleberri distopikoan oinarritutako telesaila da. Garai bateko AEBetako lurretan kokatutako Gilead izeneko erregimen teokratiko, puritano eta militaristan murgilduko da ikus-entzulea. Kutsaduraren eta gaixotasunen ondorioz, jaiota-tasak behera egin du nabarmen, eta antzuak ez diren emakumeak indarrez gatibu bihurtu, bortxatu eta umeak erditzeko erabiltzen dituzte. Autoritarismoaren, ugalketa-eskubideen eta emakumeen gorputzen inguruko gogoeta eragiten du. June (Elizabeth Moss) da pertsonaia nagusia. 

• Pose. Istorioa 1987an hasten da eta New Yorkeko gizartearen hainbat alderdiren arteko kontrastea erakusten du. Garai hartako LGTBIQ+ komunitatearen, afroamerikarren eta latinoen ballroom (dantza eta desfile lehiaketak) kultura undergroundean du ardatz.
• Unbelievable. Telesailak Marie Adler (Kaitlyn Dever) izeneko 18 urteko nerabe baten istorioa kontatzen du. Sexu-erasoa salatuko du Mariek, baina poliziak eta ingurukoek zalantzan jarriko dute bere bertsioa, eta azkenean, presiopean, salaketa faltsua jarri duela aitortzera behartuko dute. Urte batzuk geroago, bi emakume detektibek (Toni Collette eta Merritt Wever aktoreak) antzeko eraso kasuak ikertzen hasiko dira, serie bortxatzaile bat harrapatzeko asmoz.
• Big Little Lies. Liane Moriartyren izen bereko eleberrian oinarritutako telesaila da, eta Montereyko (Kalifornia) klase altuko ama batzuen bizitza eta beren inguruan gertatzen den hilketa baten inguruko sekretuak kontatzen ditu. Genero indarkeria, ahizpatasuna eta gizarteko itxurakeria ditu gaitzat. Reese Witherspoon, Nicole Kidman, Laura Dern, Zoe Kravitz eta Shailene Woodley dira aktore nagusiak.