Gasteizko Orbain Kultur Elkarteak musikarekin eta gai sozialekin lotutako filmak eskainiko ditu

Maiatzeko astearteetan ikus-entzunezko lan bat proiektatuko dute Orbain Kultur Elkartearen Navarro Villoslada kaleko 8. zenbakiko lokalean, Doku-mental izeneko zikloaren baitan. Musika eta gai sozialak ardatz dituzten filmak, dokumentalak edo halako ikus-entzunezkoak izango dira, Euskal Herrian zein kanpoan ekoitziak, eta punk-rock unibertsoaren presentzia nabarmena dutenak. Ikus-entzunezko horiekin lotura duten pertsonekin solasaldiak egiteko asmoa ere badute emanaldiekin batera. Astearteetan egingo dituzte emanaldiak, 19:00etan, gaurkoa izan ezik. 

Gaur abiatuko dute zikloaren maiatzeko egitaraua, 18:00etan, Ivan Muñizen Una Orquesta Armada. ¿Puede la música cambiar el mundo? dokumentalarekin. Musikaren botere eraldatzaileari buruzko film dokumentala da, Iñaki Urbizu Pela eta beste hainbat musikariren gogoetak eta bizipenak jasotzen dituena. Muñiz zuzendaria bertan izango da.

Maiatzaren 10ean, 19:00etan, Bangaloreko (Indiako) ehungintzako langileak ugazabekin dituzten gorabeheren inguruko Las costuras de la piel dokumentala proiektatuko dute. Ondoren, UGT eta CNT sindikatuetako ordezkariekin solasaldia izango da. 

Saharari buruzko Kafana ¡Basta ya! dokumentala emango dute maiatzaren 17an, 19:00etan. 'Kafana' ("Aski da!") saharar errefuxiatuen sentimendua da, eta beren herrira itzultzea eskatzen dute. Jarraian, Arabako SEADen Lagunen Elkartearekin solasaldia egingo dute. 

Maiatzaren 24an, 19:00etan, El ejército secreto de la OTAN: Operación Gladio dokumentalaren txanda izango da. Gladio Operazioa NATOrekin lotutako ezkutuko espioitza-sarea izan zen, Gerra Hotzean Mendebaldeko Europan jardun zuena eta Inteligentzia Agentzia Zentralak (CIA) finantzatu zuena.

Azkenik, maiatzaren 30ean, 19:00etan, Punk Attitude dokumentala eskainiko dute. Don Letts-en lan honetan, genero horretako hainbat figurek punk rockari buruzko beren ikuspegia eta esperientziak kontatzen dituzte. Bertan parte hartu dute honako hauek, besteak beste: David Johansen (New York Dolls), Thurston Moore (Sonic Youth), Henry Rollins (Black Flag), Captain Sensible (The Damned), Jim Jarmusch, Mick Jones (The Clash), Jello Biafra (Dead Kennedys) eta Siouxsie Sioux (Siouxsie and the Banshees). 

Emanaldi guztiak doakoak izango dira, eta ikus-entzuleek krispetak hartzeko aukera izango dute. 

Sortzaile eta eragileei irekia
Ikus-entzunezko sortzaileen eta askotariko eragileen eskura jarri dute elkartea, ziklo honen barruan elkarlaneko jarduerak antolatzeko. "Gure azpiegitura, agertokia eta lokala euren eskura jartzen ditugu, eta ez gara ixten espiritu horrekin datozen edozein motatako proposamenetara", azaldu dute elkarteko kideek.

Gainera, streaming bidez zuzeneko emisioak egiteko edo ekitaldiak grabatzeko ekipoa martxan jarri dutela jakinarazi dute. Hala, hitzaldiak, erakusketen inaugurazioak, disko edo liburuen aurkezpenak, eta kontzertuak grabatu edo zuzenean igortzeko aukera eskainiko diete bertatik igarotzen diren gonbidatuei.