Edurne Portela, Koro Navarro, Irati Jimenez eta Teresa Maldonadori egingo diete aitortza Euskadi Literatura Sarietan

Gaztelaniazko Literatura saria jasoko du Edurne Portela Caminok, Los ojos cerrados (Galaxia Gutenberg) lanagatik; Euskarazko Literatura Itzulpenarena Koro Navarro Etxeberriak, Ernest Hemingwayren Fiesta Eguzkia jaikitzen da (Erein&Igela) liburua euskara ekartzen egindako lanagatik; euskarazko saiakerarena emango diote Irati Jimenez Uriarteri, Begiak zabalduko zaizkizue (Elkar) liburuagatik; eta gaztelaniazko saiakerarena Teresa Maldonado Barahonari, Hablemos claro (Catarata) obragatik.

Joan den astean jakinarazi zituzten gainerako hiru saridunak. Uxue Apaolazak jasoko du Euskarazko Literatura saria Bihurguneko Nasa lanagatik (Susa), Leire Bilbaok Euskarazko Haur eta Gazte Literaturakoa Barruko hotsak (Pamiela) liburuagatik, eta Literatur Lanaren Ilustrazioaren Euskadi Literatura saria Maite Mutuberriak jasoko du Irrimola (Ikaselkar) liburuagatik. 

Lehen aldiz zazpi emakumeren lana sarituko dute eta, era berean, Gaztelaniazko Saiakerako saria emakumezko batek jasotzen duen aurreneko aldia izango da. 

Epaimahaien arrazoiak
Txani Rodriguezek, Javier Maurak, Aixa de la Cruzek, Jesus Camarerok eta Patricia Millanek osatu dute Gaztelaniazko LIteraturako aurtengo epaimahaia  eta euren hitzetan, Edurne Portelaren Los ojos cerrados lana “nobela korala da, non ahotsek, errealitatea ulertzeko moduek eta hizkuntzek mikrokosmos bat eraikitzen duten, non kalteak belaunaldiz belaunaldi heredatzen diren, baita isiltasunak, konplizitateak eta lotsak ere”.  Kontatutakoaren eta kontatu gabekoaren arteko tentsioa sortzen duen "ikuspuntu joko aberasgarria" ere nabarmendu du epaimahaiak. 

Aintzane Ibarzabal, Idoia Gillenea eta Idoia Santamaria izan dira Euskarazko Literatura Itzulpenaren Euskadi Literatura sarian epamaimahai, eta Koro Navarroren  liburuaren "balio literario handia" azpimarratu dute, eta “euskarak dituen baliabide berezkoak baliatu" izana. "Elkarrizketen tonu egokia, erregistro eta ahotsen txandakatzeak, pasarte narratibo eta deskriptiboen jarraipen erosoa, prosaren soiltasuna, zehaztasuna eta eraginkortasuna” ere balioetsi dituzte epaimahaikideek. 

Irati Jimenezen Begiak zabalduko zaizkizue lana aukeratu dute Alexander Gurrutxagak, Ane Miren Larrinagak, Aitor Zuberogoitiak, Katixa Agirrek eta Xabier Aierdik. Jimenezen liburuak “hipotesi ausartak” proposatzen dituela nabarmen dute: “Testuak badu probokaziotik ere, eta nahi duenean badaki politikoki zuzena ez izaten. Aipagarria da irakurleari etengabe interpelatzeko egiten duen ariketa, honengan gogoeta sorraraziz. Liburuaren tonuak literaturarekiko pasioa, maitasuna eta grina transmititzen ditu, eta estilo aldetik landua eta pertsonala da”. 

Azkenik, gaztelaniazko saiakerako epaimahairentzat Teresa Maldonado “estilo bereziki zehatz eta argiarekin, gai konplexu eta polemiko bat modu zehatz eta errazean baina zehaztasunez heltzeko gai da, une oro jarrera neurtua eta azalpen-argitasuna erakutsiz, eztabaida hauetan ohikoa ez dena. Presarekin oso bateragarriak ez diren ekintzak irakurtzera, pentsatzera eta deliberatzera bultzatzen du”. Mikel Reparazek, Iñigo Maraurik, MªJesus Pandok, Ainhoa Novok eta Javier Camarra aritu dira epaimahai lanetan. 

Sari-banaketa azaroaren 24an
Euskadi Literatura Sariak azaroaren 24an banatuko dituzte Donostiako Tabakaleran. Irabazleek 18.000 euroko saria jasoko dute, eta beste 4.000 euro eskura ditzakete beren lana beste hizkuntza batean argiratzen bada.