Denbora erremediorik gabe galtzen duzu? Bota errua amigdalari

Geldi hor! Zergatik ari zara artikulu hau irakurtzen? Ordu hauetan? Ez zara denbora galtzen ibiliko, ezta? Harrapatu zaitugu! Erremediorik gabeko prokrastinatzailea bazara, lasai, aurkitu dugu zure arreta faltaren arrazoia. Hemendik aurrera, bota errua amigdalari!

Alemaniako Bochum hiriko Ruhr unibertsitatean egindako ikerketaren arabera, amigdala handia duten pertsonek antsietate gehiago sentitzen dute betebehar baten aurrean daudenean; izerditzen hasten dira, eta azkenean, egin beharrekoak gerorako uzten dituzte. Denbora galtzen duten pertsonek zailtasunak dituzte emozioak gestionatzeko, eta beren arreta desbideratuko duen guztiari egiten diote kasu.

Hala, ikertzaileen esanetan, denbora galtzearen fenomenoa ez dago egin beharrak gestionatzeko gaitasun faltarekin lotuta, emozioak gestionatzeko gaitasun ezarekin baizik. Beraz, prokrastinatzen duten pertsonek beren sentipenak kontrolatzen ikasi behar dute denbora galerak ekiditeko. Nola? Hemen dituzue gomendio batzuk:

• Entrega datarik ez baduzu, markatu zure buruari lan denborak; 25 minutu lan, 5 minutu atseden...
• Idatzi egin beharrekoekin zerrenda bat eta aukeratu egingarrienak lehenik.
• Saiatu zure arreta desbideratuko duten elementuak aldentzen; mugikorra, mezuak, emailak...
• Gustatzen ez zaiguna ez egiteko erabiltzen dugun aitzakia okupatuta gaudela esatea da. Ez okupatu zure burua, eta ekin behingoz egin beharrekoari denbora duzunean!