Badator Bilbao Hiria Pop-Rock lehiaketa

Europako musika talde gazteen erreferentzia bilakatu da Bilbao Hiria Pop-Rock lehiaketa, eta urtez urte talde bikainak irteten dira bertatik. Gaur abiatzen da jaialdiaren 24. edizioa eta urria amaiera bitarte 38 emanaldi izango dira ikusgai Bilborock aretoan.

---

Bilboko Udaleko Euskara, Gazteria eta Kirol Sailak antolatutako lehiaketak 24. edizioa du aurtengoa. Euskal Herrian ez ezik, estatuan eta baita Europa osoan ere ospetsu egin da, eta The Riff Truckers eta The Free Fall Band izan dira, besteak beste, azken edizioetako irabazleak.
Izena emateko epea maiatzaren 31ra bitarte egon zen zabalik. Lehiaketan talde europarrek soilik parte hartu ahal izan dute, eta taldekideek 35 eta 18 urte bitartekoak izan behar zuten. Gainera, disko bat baino gehiago kontratu diskografiko bati loturik duten taldeek ezin izan dute izenik eman. Aurreko edizioren batean parte hartu duten taldeek aurten ere egin ahal izan dute, baldin eta aldez aurretik lehen saririk lortu ez badute.
Lehiaketa hiru fasetan banaturik egon da, eta lehen aukeraketa epaimahaiak egingo zuen. Orain, fasea gainditu zuten taldeek gaurtik hasi eta urriaren 27ra bitarte joko dute Bilborock aretoan, eta bertatik epaimahaiak beste aukeraketa bat egingo du; horiek azken kontzertu bat eskainiko dute, eta garailea bertatik irtengo da. Noski, kategoria bakoitzeko sari bat izango da.