Arima: "Pilula txikiak argitaratzea nahiago dugu".

Nahiz eta oraindik baduen shoegaze eta dream-pop ukitua, zuen lehen EP-arekin alderatuta, Biluztasunez jantzita-ren soinuan doinu rockeroagoak bilatu dituzue?
Ez gara ezer bilatzera joan, abestiak konposatzean horrela suertatu zen. Gainera, talde moduan denbora gehiago daramagunez elkarrekin jotzen, gure soinua gehiago sendotu da, aurreko diskoarekin alderatuz antzematen da sonoritatean.

Aurreko EParen atmosferek begiak itxi eta hegan egitera gonbidatzen zuten entzulea. Oraingoak ordea, oinak lurrean edukiz norbere zaurgarritasunari begietara begiratzeko gonbita dela esango nuke. Horregatik Biluztasunez jantzita izenburua?
Bai, hori izan daiteke. Disko honen edukien isla dira letrak eta musika. Konposatzerakoan barnean izandako sentimendu horiek azalarazi ditudalako, emozionalki biluziz. 

Nolakoa izan zen EP berri honen sorkuntza prozesua?
Guztiak konfinamendu garaian idatzi eta konposatu nituen Ametsen noranzko errealistie kantaren letra izan ezik, Alex Uriarte idazlearena baita. Konfinamendua nahiko garai zaila izan zen eta bertatik ihes egiteko eta nire buruarekin konektatzeko beharra sumatu nuen. Horrela, etxeko lokalera jaisten nintzen eta bertan abestiak konposatzen hasi. Ondoren, gainerako taldekideekin abestiak borobildu genituen eta abuztuan Bonbereneako estudiora joan ginen Karlos Osinaga Txap-ekin diskoa grabatzera. Astebetean grabatu genuen.

Zein izan dira zure erreferenteak?
90. hamarkadako musika asko entzun dut eta nire oinarriak Sonic Youth, Nirvana, PJ Harvey… direla esan dezaket. Hala ere, ondoren, Shoegaze, Noise, Post-Rock, Hard-Core estiloak ezagutu nituen eta mundu honetan murgildu nintzen. Beraz, Slowdive, Touché Amoré, Birds in row, Nothing, Nudozurdo, Caspian… dira orain arteko talde gustokoenetako batzuk.

Zein dira kantu sorta berri honekin zehaztu dituzuen helburuak?
Ez dugu epe luzerako inolako helbururik ezarri, orain aurkezpen kontzertu batzuk emango ditugu eta hauek gozatzea da helburua.

Letra ilunak dira, dudaz eta galderez josiak, abesti batean diozuen bezala gure pentsamenduaren biktimak al gara?
Esango nuke baietz, gure gogamena gure etxea da eta hau antolatu, garbitu eta berreraiki behar dugu leku eroso bat bihurtzeko. Disko honetako letrek nolabait barneko sentimendu, emozio eta pentsamendu horiek azaleratzen dituzte eta nahiko pertsonalak direla esan dezaket.  Sufriarazten gaituen sentimenduei edota pentsamenduei erreparatzea eta hauek onartzea beharrezkoa da hazkuntza pertsonala eman dadin. Gainera, barneko ezinegon hau zerbait bisual edo kasu honetan musikalean bihurtzen badugu oso lagungarria izan daiteke gure burua hobeto ulertzeko, introspekzio ariketa bat bezala. Sufrimendua transformatzeko gaitasun hau tresna terapeutiko indartsu gisara erabili daiteke eta guztiok modu batean edo bestean landu dezakegun zerbait da; garai hauetan are gehiago.

Zenbaterainoko garrantzia dute letrek zuen musikan?
Lehen baino gehiago esango nuke. Niretzat betidanik instrumentazioak garrantzi handia izan du, baina letrei errespetu asko diet eta azkenaldi honetan hauek gehiago lantzen aritu naiz, izugarrizko boterea baitute bai gizarte arloan, bai pertsonalean.